Ізбастин турнирі спорт пен білімді ұштастырған ерекше жобаға айналды
Павлодарда өткен Рымтай Ізбастинді еске алуға арналған республикалық турнир жас балуандар үшін спорттық бәсеке ғана емес, білімге жол ашатын ерекше мүмкіндік болды.
Жарыс қорытындысы бойынша 9 салмақ дәрежесінде топ жарған балуандарға жоғары оқу орындарының 9 білім гранты табысталды. Бұл — турнирдің ең маңызды ерекшеліктерінің бірі.
Спорт пен білімді ұштастырған бұл бастаманың жүзеге асуына турнир демеушілерінің қолдауы да әсер етті. Дәстүрлі дода «Самұрық-Қазына» әл-ауқат қоры» акционерлік қоғамы және Sport Qory туризм индустриясы мен спортты қолдау қорының демеушілігімен ұйымдастырылды.
Спорт пен білімді қатар қолдау — жасөспірімдер спорты үшін өте маңызды бағыт. Себебі жас спортшының болашағы тек жарыстағы нәтижемен шектелмеуі керек. Ол білім алып, тұлға ретінде қалыптасып, алдағы өмір жолында өз орнын табуы қажет. Осы тұрғыдан алғанда Рымтай Ізбастин турнирі спорттағы жетістік пен білім жолын байланыстыратын нақты алаңға айналып отыр.
Биылғы гранттар төрт жоғары оқу орны тарапынан бөлінді. Павлодар, Петропавл және Алматы қалаларындағы университеттердің бұл бастамаға қолдау көрсетуі жас балуандарға деген сенімнің көрінісі болды.
Бір қызығы, турнирдің бұл бағыты жыл сайын кеңейіп келеді. 2025 жылы жеңімпаздарға үш жоғары оқу орнының 3 білім гранты берілсе, биыл грант саны 9-ға жетті.
Бұл көрсеткіш турнирдің тек спорттық шара ретінде ғана емес, әлеуметтік мәні бар жоба ретінде дамып келе жатқанын дәлелдейді. Жеңімпаз жас балуан үшін чемпиондық атақпен бірге білім грантын алу — оның алдағы өміріне нақты әсер ететін үлкен қолдау.
Осылайша, Рымтай Ізбастин турнирі жас ұрпақтың спорттағы және білімдегі мүмкіндіктерін қатар кеңейтетін маңызды бастамаға айналды.
